എംബിബിഎസ് വിദ്യാർത്ഥികൾക്ക് ആശ്വാസം: ഇനി ട്യൂഷൻ ഫീസ് 4.5 വർഷത്തേക്ക് മാത്രം, സർക്കാർ ഉത്തരവിറക്കി

തിരുവനന്തപുരം: സംസ്ഥാനത്തെ എംബിബിഎസ് വിദ്യാർത്ഥികൾക്ക് വലിയ ആശ്വാസം. എംബിബിഎസ് കോഴ്സിന്റെ ട്യൂഷൻ ഫീസ് ഇനി നാലര വർഷത്തേക്ക് മാത്രം ഈടാക്കിയാൽ മതിയെന്ന് സംസ്ഥാന സർക്കാർ ഉത്തരവിറക്കി.

നാഷണൽ മെഡിക്കൽ കമ്മീഷന്റെ കർശന നിർദ്ദേശത്തിന്റെ അടിസ്ഥാനത്തിലാണ് സർക്കാരിന്റെ അടിയന്തര നടപടി. 2024-ലെ ഗ്രാജ്വേറ്റ് മെഡിക്കൽ എജുക്കേഷൻ ചട്ടപ്രകാരം എംബിബിഎസ് കോഴ്സിന്റെ അക്കാദമിക് കാലാവധി നാലര വർഷമാണ്. ഈ കാലയളവിലെ ഫീസ് മാത്രമേ ഈടാക്കാവൂ എന്നാണ് പുതിയ ഉത്തരവ്.

കോഴ്സിന്റെ യഥാർത്ഥ കാലയളവായ നാലര വർഷത്തെ ഫീസ് മാത്രം ഈടാക്കിക്കൊണ്ട് ഫീസ് റെഗുലേറ്ററി കമ്മിറ്റി പുതിയ ഫീസ് ഘടന പുതുക്കി നിശ്ചയിക്കുമെന്നും സർക്കാർ അറിയിച്ചു.

കേരളത്തിലെ സ്വാശ്രയ മെഡിക്കൽ കോളേജുകൾ അഞ്ച് വർഷത്തെ ഫീസ് വിദ്യാർത്ഥികളിൽ നിന്ന് ഈടാക്കുന്നതായി വ്യാപക പരാതി ഉയർന്നിരുന്നു. ഇത് വിദ്യാർത്ഥികൾക്ക് ലക്ഷക്കണക്കിന് രൂപയുടെ അധിക സാമ്പത്തിക ബാധ്യതയാണ് ഉണ്ടാക്കിയിരുന്നത്.

Also read: കോഴിക്കോട് പാളയത്ത് യുവാവിന്റെ മരണം കൊലപാതകം

പുതിയ ഉത്തരവ് പ്രകാരം അധികമായി ഈടാക്കിയ ഫീസ് തിരികെ നൽകുന്നതിനെക്കുറിച്ചോ ക്രമീകരിക്കുന്നതിനെക്കുറിച്ചോ ഉള്ള വ്യക്തത ഫീസ് റെഗുലേറ്ററി കമ്മിറ്റിയുടെ പുതിയ ഘടനയിലൂടെ ഉണ്ടാകും. നാലര വർഷത്തിന് ശേഷമുള്ള ഇന്റേൺഷിപ്പ് കാലയളവിൽ ട്യൂഷൻ ഫീസ് ഈടാക്കാൻ പാടില്ല എന്നതാണ് ഉത്തരവിന്റെ പ്രധാന ഹൈലൈറ്റ്.

Content Highlight: Kerala Govt Order: MBBS Tuition Fee Only for 4.5 Years, Relief for Students

#MBBS Fee #Kerala Govt #Medical Education #Fee Regulatory Committee